Ang Magpatuloy Para sa Layunin

    

     

    Nasubukan mo na bang tanungin ang iyong sarili kung bakit patuloy kang nagpapatuloy? Ano ang dahilan kung bakit naririto ka at sinusubukang umusad? Ano ang nagtutulak sa 'yo upang magpatuloy? Kasi ako, maraming beses nang napagnilayan ang mga katanungang iyan at kagaya ngayon, natagpuan ko pa rin ang aking sarili na pareho ang isinasagot mula noon.

    Sa mundong kaliwa't kanan ang direksyon, pinipili ko ang landas kung saan tiwala akong patungo sa tagumpay. Para sa akin, iyon ay ang magpatuloy sa pag-aaral kung saan ang bawat hakbang ng aking mga paa'y tila musika sapagkat batid kong ang hinahabol ko'y hindi lamang mga pangarap at layunin ko. Kasabay ko ring lumandas ang mga sakripisyo, paghihirap at pangarap ng aking mga magulang makarating lamang ako sa kinatatayuan ko ngayon. Tulad noon, ang sagot ko sa tanong kung bakit ako nagpapatuloy bilang isang mag-aaral ay sila, ang aking mga magulang na hindi nabigyan ng pagkakataong makapag-aral at matupad din ang kanilang mithiin. Sila na nakikita ang sarili sa akin at sila na naniwala at sumuporta sa kakayahan ko. Batid kong ang pangarap ko'y pangarap din nila kung kaya't nais kong magpatuloy sa pag-aaral upang sa huli, masuklian ko ang mahabang panahon nilang paghihirap at mabigyan ng karapat-dapat na buhay para sa kanila.

    Bukod sa aking mga magulang, isa sa mga dahilan na nagtutulak sa akin upang magpatuloy sa pag-aaral ay ang mithiin kong maging isang ganap na doktor at magawang makapaglingkod sa aking kababayang nangangailangan. Nais kong makatulong gamit ang kaalaman na nakamtan mula sa paghihirap sa pag-aaral. Pinapangarap ko ring maging bahagi sa pagpapabuti ng buhay ng iba sa paraan ng medisina. Sa pamamagitan nito, ako ay magiging isa sa mga naging parte ng solusyon sa problema ng aking mga kababayan. Hangad ko ang makapagbigay ng panibagong pag-asa pati na rin sa aking bayan sapagkat para sa akin, ang propesyong naglilingkod sa bayan at kababayan ay isang propesyong hindi matatawaran. 

       Sa lahat ng ito, masasabi kong ang pagpapatuloy ko sa aking pag-aaral ay isang patunay ng pagpapatuloy ko sa aking layunin. Wala akong nakikitang dahilan para sukuan ang aking pag-aaral sapagkat batid kong ang mag-aral ay minsang mahirap, madalas pribilehiyo. Nakakakaba man ang daan, hindi ako matatakot sapagkat masuwerte akong magkaroon ng ilaw sa bawat landas na tinatahak ko. Ang aking mga inspirasyon, mithiin at layunin ang siyang nagtutulak sa akin upang magpatuloy sa pag-aaral sapagkat ang tagumpay na makakamit ko mula rito ay siyang tagumpay rin ng aking magulang at bayan na hangad kong matulungan.